Schlagwort-Archive: Erntedank

Abendgebet eines Fünfjährigen / Ovvendjebett va ene Fönnefjöhrige

Ein herrliches Gedicht von Sibille Thomas-Schiffers darüber was Kinder wohl im Stillen an den lieben Herrgott herantragen.
Vorgetragen im Stauferkeller am 07.10.2013.

Leäve Herrjott,
Sondaag wor ich met de Mam ejjen Kerch, doe woet Erntedank jefiiehrt.

Et stonge Eädäppel, janze Köpp Jemös, Äppel, en Kann Melch an sujar en Röpp a d’r Altoer.
För all die Sache donge sich de Lü beij dich bedanke.

Dorophen han ich mich die Sache ens dörch d’r Kopp johe losse. Du kanns dich dat janze Werk met dat wahße losse spare.

Exempelswies de Eädäppel:

Mer esue jekoucht schmache se mich suwiesue net.
Fritte än Riietköch kritt mer een jedde Pommesbud än Pürree maht de Mam ömmer uus de Tüt.

För die jrueße Köpp Jemös – kan ich dich ouch ene jowe Roet jevve:
Rof beij bo-frost aan, die leffere os jeddes Jemös, wat vür han welle — än dat es at feädig.
De Mam sätt ömmer, die janze Kochereij kan ich mich spare
“.

E paar Äppel kans de noch waaße losse, die eäß ich av än zou jeär, mer leäver han ich Banane.
Evver Kompott uus Äppel? Beij d’r Aldi jet et hömmele Tüte dova.

Wat ich jarnet verstohe kan, es die Kann met Melch! Wo koem die her?
Ömmer sage se all a mich: ”der liebe Gott sieht alles“!
Wiesue siss du dan net die Tüte Melch een jeddes Jeschäff?

Än dan die Röpp! Mengs du de Mensche dönge Röbbe eässe?
Dat freässe noch jeng Köh miehe, die krijje Silage.
Die stenkt zwor, ävver de Diere könne se wenigstens köjje.
Röbbekruut brengt de Mam ouch e Jläser met!

Leäve Herrjott, nun han ich dich esue vöhl Zitt jespart.
Dat de dich nun öm anger Saache kömmere kans, die wichtiger sönd.

Setz dich leäver met et Chreskenk zesame än fangt a ze övverlege –
domet ühr ming Jeschenke zittig bes Chresmes feädig kritt.

Minge Wonschzeddel beän ich mich ene angere Ovvend. Ich ben nu möjj.

Ame

Merci an Sibille Thomas-Schiffers für die schöne Geschichte!